Reseña: Nunca Vencida, de David Guardado.

                           

Semeya: Nortes.me

                Hai poques selmanes la editorial La Fabriquina asoleyó la obra Nunca Vencida: una historia sobre la idea d´Asturies, de David Guardado. Anque la espublización de la obra tuvo perbona acoyida nes presentaciones y pescudamos que nel volume de venta. Pero ye significativu'l pocu interés que na prensa asturiana espertó una obra qu'afonda na idea de la perceición que'l Pueblu Asturianu y tamién les sos élites tuvieron historicamente haza Asturies como comunidá humana. 

L'autor ye rigurosu coles fontes ya indaga perbién nel desendolcu de la so idea. Dende'l nuestru puntu vista nun peca de mercar una idea previa pa depués desenrrollar el so conteníu, más bien espeya una idea que ye innegable, la d'Asturies como país somorguiáu baxo un discursu utilitarista pa intereses ex-post o ayenos a la realidá popular asturiana. Destacar que la obra nun ye un estudiu sobre la historia d'Asturies, ye más bien un percorríu bien documentáu poles visiones que delles personalidaes fixeron d'esa historia, rescamplando por supuestu les visiones salíes dende les élites que marcaron el destín de la nuestra realidá sociopolítica ya historiográfica. 

Si bien la obra nun ye percorríu detalláu sobre la historia d'Asturies, acabamos de mencionalo, pal llector menos avezáu poles espublizaciones sobre la historia de la nuestra tierra ye una bona ferramienta pa entender el filu hestóricu asturianu. En tola obra y en toles desplicaciones sobre la historia d'Asturies que Guardado ufre vamos ver munchos episodios que tuvieren gran caláu históricu. Podemos afirmar de fechu que la obra sirve pa conocer les estremaes visiones que se tuvieron dende los primeros tiempos sobre Asturies como realidá territorial y sociapolítica, pero al empar ye una ferramienta meramente histórica bien pedagóxica. 

Asina podemos alcontrar nes fueyes escrites por Guardado dellos mitos sobre la historia d'Asturies que se van tresmitiendo nel tiempu de forma continua: l'escepcionalismu asturianu, el mitu de la maternidá (d'España) o'l mitu de la independencia son idees mui asentaes pa desplicar d'una forma simple ya interesada la nuestra historia como realidá humana dende diferentes posiciones. El llector va atopar una gran bayura de idees dende diversos sectores que siempre acaben abrazando diversos sesgos de mitificación pa desplicar el nuestru pasáu pero sobre manera pa xustificar el presente y el futuru.

Da-y valor tamién a cómo l'autor rescata bona parte de los relatos más escaecíos sobre la nuestra historia, fundamentalmente la tradición republicana federal qu'hebo nel país bona parte'l sieglu XIX y XX, una narrativa sobre Asturies más enfotada n'autoperceición y l'autonomía, que foi hexemónica ente les clases populares asturianes pero que les elites consiguieron cuasi desaniciar del mapa de la historia dende les primeres dácades del XX, col franquismu y el Réxime'l 78 como factores determinantes pa facer esti borráu.  

Tamién ye d'interés nos primeros cápitulos del llibru cómo David Guardado, qu'insistimos ufre una gran y variada bibliografía desmonta'l mitu de la llamada "Reconquista" y "maternidá" pol que tanto puxó'l nacional-catolicismu y que desgraciadamente güei sigue siendo hexemónicu en bona parte de la sociedá. Nos caberos capitulos amás vemos una bona semeya sobre l'impactu que la llucha de clases y l'emburrie del movimientu obreru tuvieron pa francer con bona parte d'estos discursos sobre Asturies

Ensín dulda un gran trabayu que sirve pa ver como les distintes corrientes de pensamientu pueden facer interpretaciones mui diverses de los mesmos fechos históricos o apropiase y resignificar dellos símbolos colectivos en pro de determináu suxetivismu. Una gran obra, atrevida al empar qu'orixinal sobre una asinatura pendiente de la historiografía asturiana: mirar p'Asturies de forma autónoma y espeyar les carencies de los discursos ayenos a la la nuestra realidá, discursos totalmente románticos y romantizaos pero que siempre fueron funcionales contra l'Asturies trabayadora y popular.