Cuba: ayudes humanitaries SI, Llevantamientu del bloquéu ¿NON?

 

Nos caberos díes venimos asistiendo a una nueva agresión contra'l modelu sociopolíticu cubanu, esta vegada quiciabes con mayor repercusión internacional y organizada polos enemigos de la Revolución Cubana d'una forma más acertada, reconocelo ye lo primero. A metada del pasáu mes de xunu entamaron a percorrer per redes sociales mensaxes y proclames pidiendo solidaridá col pueblu cubanu, cola etiqueta #SOSCuba, falando d'una situación pergrave, con falta de comida, melecines y bienes de primer necesidá. Munchos d'estos perfiles en redes sociales, sobremanera na rede Twitter, taben falseando la xeollocalización y agora ta demostrándose que la ubicación real d'estos perfiles yera EEXX, Miami mayormente, y non Cuba, como trataron de facer ver. 

Avanzáu el mes de xunu y llegando a xunetu xente pernomada n'ambetos d'Internet apautáronse tamién a esta campaña #SOSCuba, munchos de los nomaos influencers o youtubers, en fin, xente que ta avezada a facer publicidá pa la empresa privada y con muncho talentu nesti sen. Y estos pasaos díes la campaña espardiose a los típicos actores y cantantes qu'avecen a metese nestos charcos no que cinca a los países d'America Llatina con gobiernos progresistes. Nun paga la pena nomalos.

Lo ciertu ye que la situación oxetiva nesti intre en Cuba nun ye buena en munchos aspeutos. Los númberos del Covid, como nel restu'l mundu, tan xubiendo y la situación sanitaria ta más tensa. La distribución d'alimentos si que ye ciertu que nun paez afeutada nesti momentu y caltiense nos niveles normales. De toles formes, les carencies materiales son bien evidentes y la situación cola pandemia evidentemente ta agravándose. ¿Si munchos países imperialistes tan al borde'l colapsu socioeconómicu por mor de la situación pandémica un país como Cuba diba vivir esti episodiu como si nada?

Pues bien, vimos estos díes delles movilizaciones de ciudadanos cubanos protestando pola situación socioeconómica y tamién política, movilizaciones que ciertamente nun suelen dase en Cuba pero que mui lloñe de ser masives malpenes axuntaben a decenes de persones, cola esceición de La Habana, ónde s'axuntaron dellos cientos de persones. Ye verdá qu'a la situación y a estes protestes hai que da-yos importancia pola novedá que suponen. Pero tamién rescampla cómo'l focu mediáticu, por supuestu, ta  ehí pa facenos ver estes movilizaciones. ¿Imaxinen una movilización en Cuenca por exemplu pola amnistía de presos políticos en España que sal en tolos medios internacionales y ta protagonizada por ochenta persones? ¿Non, verdá?

Por supuestu, nuevamente surde tol mensaxe anticuba nos mass-media: Dictadura, drechu a la llibre espresión, brutalidá policial, etc. Los parlamentos nacionales de les democracies burgueses ponen el focu nel gobiernu de Díaz-Canel acusandolo de tolos males de la humanidá, los voceros mediáticos manipulen la situación real de Cuba y la gusanera en Miami direutamente emplega semeyes de brutalidá policial nel Estáu Español pa xustificar el so relatu. La verdá pa los imperialistes ye irrelevante cuando hai dólares pel mediu mentantu pa les persones de progresu la verdá sigue siendo revolucionaria. 

Estes protestes contra'l Gobiernu de Cuba en parte pueden venir de la precaria situación que vive la xente na islla en determinaos aspeutos pero españa con un relatu sobre una supuesta mala xestión de la pandemia. Si facemos alcordanza hai cuatro díes dellos países europeos taben pidiendo ayuda urxente a brigaes méliques cubanes, l'exemplu d'Italia foi bien mediáticu y claro. Per otru llau, la xestión sanitaria de la crisis del Covid 19 ta siendo exemplar, con una atención a los enfermos de Covid gratuita y de calidá, unes cuarentenes bien organizaes y una distribución de bienes y melecines dignu, dientro les actuales circunstancies. Y por supuestu, Cuba ye la única nación d'America Llatina con vacuna propia con certificación internacional. ¿De verdá que la xestión de la pandemia en Cuba ta siendo tan desastrosa?

Cuadru comparativu situación de la crisis Covid-19 nel entornu de Cuba.

Y por supuestu, esta xestión exemplar de la pandemia diose cola perpetua situación de bloquéu económicu y comercial sobre la islla impuesto por EEXX dende los años 60 del sieglo pasáu. Un bloquéu qu'EEXX ta agravando inda más dende qu'entamó esta crisis global, consciente de los problemes que podría xenerar en Cuba. Y ye que los problemes materiales que se dan en Cuba nun se dan precisamente pol modelu políticu que s'apautaron los cubanos dende'l trunfu de la Revolución, más bien poles circunstancies qu'impón el bloquéu. 

Estos miserables que van d'humanitarios pidiendo solidaridá col pueblu de Cuba y la fin de la "Dictadura" son incapaces de verbalizar la necesidá d'acabar a la fin col bloquéu yanqui, munches veces por convencimientu de que'l bloquéu ye la única esperanza por desestabilizar Cuba. Otres veces los dolares que reciben de Washington pesen más que decir la verdá. 

Pero la gusanera nunca nun podrá ganar con esta estratexa. La xente puede cayer engañada un tiempu pero nun pues seguir la estratexa d'intensificar les sanciones y privaciones qu'imponen el bloquéu criminal mentanto pides que se facilite ayuda humanitaria al pueblu. Ayuda pa amenorgar les consecuencies que xenera'l propiu bloquéu. Esto ye llamar imbecil a la xente ya insultar a la nuestra intelixencia. O más bien ye la estratexa más misere y cínica que plantegó l'imperialismu yanqui pa finar col procesu socialista en Cuba y la verdá que nesti sen tienen muncha hemeroteca. 

Ye evidente que'l modelu de socialismu en Cuba ye ameyorable. Claro que sí. Obviar los problemas de burocratismu que se dan nel PCC ye tar ciegu. Tamién ye evidente que nun se desendolcaron les fuercies productives d'una forma afayaiza, afitando un modelu económicu arcaico y por supuestu dependiente del esterior. La dependencia del desaniciáu campu socialista, fundamentalmente de la URSS, sigue xenerando consecuencies na vida diaria cubana en plenu 2021. Pero i

Inda asina, ye increible cómo una nación probe caltién unos mínimos d'atención sociosanitaria y educacional que son reconocíos en tol mundu. Ye increible como colos erros de la direición del procesu cubanu y sobremanera coles privaciones del bloquéu Cuba seya exemplu en tantos índices de desenrrollu y amás amuese la so solidaridá internacional con tolos pueblos del planeta. Esto amuesa cómo'l camín socialista nun ye precisamente lo que xenera probitú y necesidá en Cuba. Nun hai más que ver la situación socioeconómica de los países de la so redolada. 

Dende files revolucionaries de tol mundu ye innegable que les crítiques que se puedan facer a la vía cubana al socialismu siempre que seyan constructives pueden ser un gran aporte pa sofitar a Cuba. Anguaño, eso si, ye momentu de  zarrar files cola Revolución y facer frente al imperialismu dende cada trinchera, en tolos requexos del mundu. Defendamos al Partido Comunista de Cuba d'esta nueva agresión dientro de la guerra non convencional na que llucha contra l'imperialismu. Vindiquemos la hestoria progresista de Cuba, que tanto ayudó a tolos pueblos del mundu nel camín de l'autoemancipación y algamemos un escenariu ónde los EEXX y los sos títeres acaben a la fin col criminal bloquéu.

A pocos díes del 26 de xunetu... ¡PUXA CUBA SOBERANA! ¡PUXA CUBA SOCIALISTA!

¡NON MÁS BLOQUÉU!